បច្ចុប្បន្នភាពចុងក្រោយ៖ ថ្ងៃទី 11 ខែកក្កដា 2023
គោលការណ៍ណែនាំទាំងនេះ (ហៅថា “គោលការណ៍ណែនាំ”) គឺជាឯកសារយោងសម្រាប់ឱ្យមន្ត្រីអនុវត្តន៍ច្បាប់ស្វែងរកទិន្នន័យរបស់អ្នកប្រើប្រាស់នៃផ្លេតហ្វម TikTok (“ផ្លេតហ្វម”) ពីអង្គភាព TikTok ទាំងឡាយណាដែលបានរាយបញ្ជីនៅក្នុងផ្នែកទី 1 ខាងក្រោម (ជារួមហៅថា “TikTok”)។ ដើម្បីទទួលបានព័ត៌មានបន្ថែម សូមមើល សំណួរដែលសួរញឹកញាប់អំពីមន្ត្រីអនុវត្តន៍ច្បាប់របស់យើង។
ដោយអនុលោមតាមសេចក្តីថ្លែងការណ៍អំពីសិទ្ធិមនុស្សរបស់យើង TikTok ប្តេជ្ញាសហការជាមួយនឹងមន្ត្រីអនុវត្តន៍ច្បាប់ ហើយក៏គោរពឯកជនភាព សេរីភាពនៃការបញ្ចេញមតិ និងសិទ្ធិផ្សេងទៀតនៃអ្នកប្រើប្រាស់របស់ខ្លួនផងដែរ។
ដើម្បីឱ្យកិច្ចការនេះសម្រេចទៅបាន បន្ថែមពីលើគោលការណ៍ណែនាំទាំងនេះ TikTok មានគោលការណ៍ និងនីតិវិធីផ្ទៃក្នុងនានាដែលគ្រប់គ្រងលើរបៀបដែល TikTok ដោះស្រាយ និងឆ្លើយតបទៅនឹងសំណើរបស់មន្ត្រីអនុវត្តន៍ច្បាប់។ នីតិវិធីទាំងនេះត្រូវបានរៀបចំដោយអនុលោមតាមស្តង់ដារច្បាប់ និងសិទ្ធិមនុស្ស និងត្រូវបានបង្កើតឡើងក្នុងវិធីមួយដែលព្យាយាមដាក់កំហិតលើឥទ្ធិពលអវិជ្ជមានលើសិទ្ធិមនុស្ស ខណៈពេលដែលអនុញ្ញាតឱ្យ TikTok អនុលោមតាមសំណើផ្លូវច្បាប់ដែលមានសុពលភាព និងស្របច្បាប់ពីមន្ត្រីអនុវត្តន៍ច្បាប់ដើម្បីលាតត្រដាងទិន្នន័យអ្នកប្រើប្រាស់។
យើងបដិសេធសំណើដែលផ្ទុយនឹងគោលការណ៍ និងនីតិវិធីរបស់យើង។
1. លក្ខខណ្ឌតម្រូវជាមូលដ្ឋាន
ជាដំបូង សំណើត្រូវតែបញ្ជូនទៅកាន់អង្គភាព TikTok ដែលត្រឹមត្រូវ។ អង្គភាពនេះគឺផ្អែកទៅលើទីតាំងរបស់អ្នកប្រើប្រាស់ដែលពាក់ព័ន្ធដូចខាងក្រោម៖
TikTok Inc. 5800 Bristol Parkway, Suite 100 Culver City, CA 90230 សហរដ្ឋអាមេរិក | សំណើសុំទិន្នន័យរបស់អ្នកប្រើប្រាស់ដែលមានទីតាំងនៅសហរដ្ឋអាមេរិក |
TikTok Information Technologies UK Limited 4 Lindsey Street Barbican London, EC1A 9HP ចក្រភពអង់គ្លេស | សំណើសុំទិន្នន័យរបស់អ្នកប្រើប្រាស់ដែលមានទីតាំងនៅចក្រភពអង់គ្លេស |
TikTok Technology Limited 10 Earlsfort Terrace Dublin, D02 T380 អៀរឡង់ | សំណើសុំទិន្នន័យរបស់អ្នកប្រើប្រាស់ដែលមានទីតាំងនៅតំបន់សេដ្ឋកិច្ចអឺរ៉ុប (រដ្ឋសមាជិកសហភាពអឺរ៉ុប រួមទាំងអ៊ីស្លង់ លិចតិនស្តាញ និងន័រវែស) និងស្វ៊ីស។ |
TikTok Pte. Limited One Raffles Quay, #26-10, South Tower, សិង្ហបុរី 048583 048583 | សំណើសុំទិន្នន័យរបស់អ្នកប្រើប្រាស់ដែលមានទីតាំងនៅខាងក្រៅសហរដ្ឋអាមេរិក ចក្រភពអង់គ្លេស តំបន់សេដ្ឋកិច្ចពិសេស ឬស្វ៊ីស។ |
សូមចំណាំថាសំណើដែលបានបញ្ជូនទៅកាន់អង្គភាព TikTok ដែលមិនត្រឹមត្រូវអាចនឹងមិនត្រូវបានដំណើរការរហូតទាល់តែបញ្ហានេះត្រូវបានកែតម្រូវ ដែលអាចបណ្តាលឱ្យមានការពន្យារពេលទាំងមិនចាំបាច់។
ទីពីរ សំណើត្រូវតែដាក់បញ្ជូនទៅទម្រង់លើបណ្ដាញរបស់យើង៖ www.tiktok.com/legal/report/lawenforcementrequest អមដោយឯកសារភ្ជាប់ទាំងឡាយ (ឧទាហរណ៍ ដីកាផ្លូវការ សេចក្ដីបង្គាប់ពីតុលាការ ឬសំណុំឯកសារផ្សេងទៀតដែលគាំទ្រសំណើ) ជាទម្រង់ PDF។
ការបញ្ជាក់ណាមួយលើការទទួលការឆ្លើយឆ្លងគឺដើម្បីភាពងាយស្រួលតែប៉ុណ្ណោះ ហើយក្នុងការធ្វើដូច្នេះ TikTok មិនបោះបង់សិទ្ធិក្នុងការជំទាស់ណាមួយឡើយ (រួមទាំងកង្វះយុត្តាធិការ នីតិវិធីផ្លូវច្បាប់មិនមានសុពលភាព ឬកង្វះសេវាកម្មត្រឹមត្រូវ)។ រាល់សំណើដែលបញ្ជូនទៅកាន់ TikTok និងឯកសារគាំទ្រទាំងឡាយ (រួមទាំងសេចក្ដីបង្គាប់ ដីកា និង/ឬដីកាកោះសាក្សី ឬឯកសារផ្សេងៗដែលមានតម្លៃសមមូល) ត្រូវតែផ្តល់ជូនជាភាសាអង់គ្លេស ឬអមជាមួយសំណៅបកប្រែ។ TikTok នឹងមិនឆ្លើយតបចំពោះសំណើសុំទិន្នន័យអ្នកប្រើប្រាស់ដែលបានបញ្ជូនមកដោយបុគ្គលដែលមិនមែនជាមន្ត្រីអនុវត្តន៍ច្បាប់ ឬនៅពេលដែលសំណើទាំងនោះត្រូវបានផ្ញើតាមរយៈបណ្តាញក្រៅផ្លូវការនោះទេ។
2. ប្រភេទនៃទិន្នន័យអ្នកប្រើប្រាស់
TikTok អាចបង្ខាំងទុកទិន្នន័យអ្នកប្រើប្រាស់ខាងក្រោម ដែលអាចធ្វើឡើងស្របតាមសំណើរបស់មន្រ្តីអនុវត្តន៍ច្បាប់ដែលមានសុពលភាព៖
ប្រភេទទិន្នន័យ | ឧទាហរណ៍ (មិនពេញលេញ) |
---|---|
ព័ត៌មានអំពីអ្នកជាវ | ឈ្មោះអ្នកប្រើប្រាស់ TikTok អាសយដ្ឋានអ៊ីមែល (អាស្រ័យលើវិធីសាស្ត្រចុះឈ្មោះរបស់អ្នកប្រើប្រាស់) លេខទូរសព្ទ (អាស្រ័យលើវិធីសាស្រ្តចុះឈ្មោះរបស់អ្នកប្រើប្រាស់) កាលបរិច្ឆេទបង្កើតគណនី អាសយដ្ឋាន IP នៅពេលបង្កើតគណនី ព័ត៌មានឧបករណ៍ |
ទិន្នន័យនៃការចូល/ចេញ | អាសយដ្ឋាន IP នៃការចូល / ចេញពីគណនី |
ទិន្នន័យអន្តរកម្ម (មិនមែនខ្លឹមសារ) | កំណត់ហេតុអាសយដ្ឋាន IP សម្រាប់អន្តរកម្ម (សម្រាប់រយៈពេលដែលបានបញ្ជាក់តែប៉ុណ្ណោះ) ពេលវេលា / កាលបរិច្ឆេទបង្កើតវីដេអូ |
ទិន្នន័យខ្លឹមសារ | ខ្លឹមសារ មតិ ខ្លឹមសារនៃសារផ្ទាល់ |
សំណើនីមួយៗត្រូវតែបញ្ជាក់យ៉ាងច្បាស់អំពីប្រភេទទិន្នន័យដែលបានស្នើសុំ និងមូលដ្ឋានផ្លូវច្បាប់សម្រាប់ការស្នើសុំទិន្នន័យនោះ។ ប្រសិនបើសំណើមិនបំពេញតាមលក្ខខណ្ឌតម្រូវផ្លូវច្បាប់ដែលពាក់ព័ន្ធសម្រាប់ទិន្នន័យដែលបានស្នើសុំ (ដូចដែលបានរាយបញ្ជីក្នុងផ្នែកទី 3 ខាងក្រោម) ទិន្នន័យនឹងមិនត្រូវបានលាតត្រដាងទេ។ ជាពិសេស គឺសម្រាប់ករណីសំណើសុំទាក់ទងនឹងទិន្នន័យខ្លឹមសារ (ដែលជាទូទៅតម្រូវឱ្យមានសេចក្ដីបង្គាប់ពីតុលាការក្នុងស្រុក / សេចក្ដីបង្គាប់ខាងផ្លូវច្បាប់ ដីកា ឬឯកសារដែលមានតម្លៃសមមូល)។
3. លក្ខខណ្ឌតម្រូវ នៅពេលធ្វើការស្នើសុំ
ត្រូវតែមានការចុះហត្ថលេខា កាលបរិច្ឆេទសំណើនីមួយៗត្រូវតែចុះហត្ថលេខា កាលបរិច្ឆេទ លើក្បាលលិខិតរបស់មន្ត្រីអនុវត្តន៍ច្បាប់ រួចផ្ញើ និងរួមបញ្ចូលព័ត៌មានខាងក្រោម៖
- ព័ត៌មានលម្អិតអំពីអាជ្ញាធរអនុវត្តន៍ច្បាប់ (ឬតុលាការ) ដែលស្នើសុំ៖
- អាជ្ញាធរ (ឬតុលាការ) ដែលស្នើសុំ៖ ឈ្មោះ និងទីតាំងរបស់អាជ្ញាធរអនុវត្តន៍ច្បាប់។ ក្នុងករណីមានសេចក្ដីបង្គាប់ពីតុលាការ សំណើគួរបញ្ជាក់ពីទីតាំង និងឈ្មោះរបស់តុលាការ និងចៅក្រម/អង្គចៅក្រមដែលពាក់ព័ន្ធ។
- មន្ត្រីដែលស្នើសុំ៖ ឈ្មោះរបស់មន្ត្រីដែលស្នើសុំ គ្រឿងសម្គាល់/លេខអត្តសញ្ញាណ អាសយដ្ឋានអ៊ីមែល (ព័ត៌មាននេះត្រូវតែបានមកពីដូមែនអ៊ីមែលផ្លូវការ) និងលេខទូរសព្ទ (រួមទាំងលេខកន្ទុយសម្រាប់ហៅទូរសព្ទដោយផ្ទាល់ណាមួយ)។
- ព័ត៌មានលម្អិតអំពីគណនីអ្នកប្រើប្រាស់ដែលពាក់ព័ន្ធ៖
- ឈ្មោះអ្នកប្រើប្រាស់ TikTok៖ នៅពេលស្នើសុំទិន្នន័យទាក់ទងនឹងអ្នកប្រើប្រាស់ជាក់លាក់នៃផ្លេតហ្វមនេះ អ្នកត្រូវតែផ្តល់ឈ្មោះអ្នកប្រើប្រាស់ TikTok ជាក់លាក់ ឬព័ត៌មានសម្គាល់គណនីដែលបានអនុញ្ញាតដែលភ្ជាប់ជាមួយគណនីដែលពាក់ព័ន្ធ។ យើងក៏ស្នើសុំឱ្យផ្ដល់រូបថតអេក្រង់នៃគណនីដែលពាក់ព័ន្ធ (ដើម្បីជួយយើងកំណត់អត្តសញ្ញាណគណនីដែលត្រឹមត្រូវកាន់តែរហ័ស)។ នៅខាងក្រោមនេះជាព័ត៌មានសម្គាល់ដែលបានអនុញ្ញាតដោយ TikTok៖
- ព័ត៌មានសម្គាល់អ្នកប្រើប្រាស់ TikTok
- ឈ្មោះអ្នកប្រើប្រាស់ TikTok (URL គណនី ឬរូបថតអេក្រង់ត្រូវបានទទួលយក)
- លេខទូរសព្ទ
- អាសយដ្ឋានអ៊ីមែល
- ព័ត៌មានសម្គាល់វីដេអូ (URL វីដេអូ ឬរូបថតអេក្រង់ត្រូវបានទទួលយក)
- ទិន្នន័យដែលបានស្នើសុំ៖ សំណើគួរបញ្ជាក់យ៉ាងច្បាស់អំពីវិសាលភាពនៃទិន្នន័យដែលបានស្នើសុំ។ សំណើទូលំទូលាយពេកនឹងត្រូវបានបដិសេធ។
- ចន្លោះកាលបរិច្ឆេទ៖ សំណើត្រូវតែបញ្ជាក់កាលបរិច្ឆេទ (ហើយបើអាច សូមបញ្ជាក់ពេលវេលា) ឬចន្លោះកាលបរិច្ឆេទដែលពាក់ព័ន្ធនឹងសំណើ (សម្រាប់តែទិន្នន័យកន្លងមកប៉ុណ្ណោះ)។
- មូលដ្ឋានផ្លូវច្បាប់សម្រាប់សំណើ៖
- នីតិវិធីផ្លូវច្បាប់ដែលពាក់ព័ន្ធ៖ សំណើនេះគួរតែបញ្ជាក់យ៉ាងច្បាស់អំពីនីតិវិធីផ្លូវច្បាប់ (ឧ. ដោយស្រង់សម្ដីពីអត្ថបទពាក់ព័ន្ធ ឬផ្នែកនៃច្បាប់/លក្ខន្តិកៈ/ក្រម) ដែលផ្តល់សិទ្ធិអនុញ្ញាតឱ្យមន្ត្រីអនុវត្តន៍ច្បាប់ស្នើសុំ និងប្រមូលព័ត៌មានក្នុងគោលបំណងបង្ការ រកឃើញ ឬស៊ើបអង្កេតបទល្មើសព្រហ្មទណ្ឌ។
- បរិបទ និងបទល្មើសដែលស្ថិតក្រោមការស៊ើបអង្កេត៖ សំណើនេះគួរតែបញ្ជាក់ដាច់ដោយឡែកពីគ្នាអំពីប្រភេទនៃបទល្មើសដែលស្ថិតក្រោមការស៊ើបអង្កេត (ដោយស្រង់សម្ដីពីច្បាប់/លក្ខន្តិកៈ/ក្រមដែលពាក់ព័ន្ធ) កាលៈទេសៈនៃបទល្មើស និងតាមរបៀបណាដែលបទល្មើសនោះមានទំនាក់ទំនងទៅនឹងផ្លេតហ្វម។
- ការជូនដំណឹងដល់អ្នកប្រើប្រាស់៖ សូមបញ្ជាក់ថាតើការជូនដំណឹងដល់អ្នកប្រើប្រាស់ត្រូវបានអនុញ្ញាតដែរឬទេ (សូមមើលផ្នែកទី 4 ខាងក្រោម)។
4. ការជូនដំណឹងដល់អ្នកប្រើប្រាស់
យើងមានគោលការណ៍ក្នុងការជូនដំណឹងដល់អ្នកប្រើប្រាស់ TikTok មុនពេលលាតត្រដាងទិន្នន័យរបស់ពួកគាត់ទៅកាន់មន្ត្រីអនុវត្តន៍ច្បាប់ លុះត្រាតែផ្តល់ការជូនដំណឹងបែបនេះ៖ (ក) ត្រូវបានហាមឃាត់ក្រោមច្បាប់ជាធរមាន (ខ) នឹងបង្កគ្រោះថ្នាក់ដល់ការស៊ើបអង្កេត និង/ឬ (គ) នឹងធ្វើឱ្យបុគ្គលម្នាក់ៗប្រឈមនឹងគ្រោះថ្នាក់។ អាជ្ញាធរអនុវត្តន៍ច្បាប់ដែលស្នើសុំមានទំនួលខុសត្រូវក្នុងការបញ្ជាក់យ៉ាងច្បាស់នៅក្នុងសំណើរបស់គាត់ថាតើបានបំពេញទៅតាមលក្ខន្តិកៈណាមួយក្នុងចំណោមលក្ខន្តិកៈទាំងនេះដែរឬទេ។ TikTok នឹងគោរពតាមសំណើបែបនេះ ក្នុងករណីដែលមានការផ្តល់ព័ត៌មានដែលគាំទ្រសមស្រប (ឧទាហរណ៍ ប្រសិនបើសំណើមួយសំដៅលើកាតព្វកិច្ចមិនលាតត្រដាងព័ត៌មានក្រោមច្បាប់ជាធរមាន)។
5. សំណើសុំការរក្សាទុក
TikTok នឹងគោរពតាមសំណើផ្លូវការដើម្បីរក្សាទុកទិន្នន័យអ្នកប្រើប្រាស់រយៈពេល 90 ថ្ងៃ។ សូមដាក់បញ្ជូនសំណើសុំការរក្សាទុកទាំងអស់ទៅកាន់ទម្រង់លើបណ្ដាញរបស់យើង៖ www.tiktok.com/legal/report/lawenforcementrequest ដោយមានភ្ជាប់សំណើសុំការរក្សាទុករបស់អ្នកជាទម្រង់ PDF។
សំណើសុំការរក្សាទុកត្រូវតែផ្ញើដោយមានការចុះហត្ថលេខាលើក្បាលលិខិតរបស់មន្ត្រីអនុវត្តន៍ច្បាប់ និងត្រូវតែកំណត់អត្តសញ្ញាណយ៉ាងច្បាស់លាស់នូវទិន្នន័យអ្នកប្រើប្រាស់ជាក់លាក់ដែលត្រូវបានរក្សាទុក (ដោយសំដៅដល់ឈ្មោះអ្នកប្រើប្រាស់ ប្រភេទទិន្នន័យ និងចន្លោះកាលបរិច្ឆេទដូចក្នុងផ្នែកទី 3 ខាងលើ)។ TikTok នឹងរក្សាទុកព័ត៌មានក្នុងរយៈពេល 90 ថ្ងៃបន្ថែម បន្ទាប់ពីបានទទួលសំណើផ្លូវការ ដើម្បីបន្តការរក្សាទុក។ យើងប្រហែលជាមិនគោរពតាមសំណើសុំពន្យារពេលបន្ថែមច្រើនហួសពីរយៈពេល 90 ថ្ងៃបន្ថែមនោះទេ។ ប្រសិនបើ TikTok មិនទទួលបាននីតិវិធីផ្លូវច្បាប់ជាផ្លូវការសម្រាប់ព័ត៌មានដែលបានរក្សាទុកមុនចុងបញ្ចប់នៃរយៈពេលរក្សាទុកនោះទេ ព័ត៌មានដែលបានរក្សាទុកអាចនឹងត្រូវបានលុប នៅពេលដែលរយៈពេលនៃការរក្សាទុកផុតកំណត់។
សំណើសុំការរក្សាទុកទូលំទូលាយពេក ឬមិនជាក់លាក់នឹងមិនត្រូវបានចាត់វិធានការទេ។ ដើម្បីស្វះស្វែងការលាតត្រដាងទិន្នន័យដែលបានរក្សាទុក លក្ខខណ្ឌតម្រូវដែលមានចែងក្នុងផ្នែកទី 1 និងទី 3 នៃគោលការណ៍ណែនាំទាំងនេះនឹងត្រូវបានអនុវត្ត។
6. សំណើសុំសម្រាប់ករណីសង្គ្រោះបន្ទាន់
TikTok ដាក់ចេញនីតិវិធីនានាដើម្បីដោះស្រាយសំណើសុំសម្រាប់ករណីសង្គ្រោះបន្ទាន់។ សំណើសុំបែបនេះត្រូវបានវាយតម្លៃដោយផ្អែកលើករណីនីមួយៗ៖ ជាផ្នែកមួយនៃសំណើសុំសម្រាប់ករណីសង្គ្រោះបន្ទាន់ ប្រសិនបើយើងទទួលបានព័ត៌មានគ្រប់គ្រាន់ដែលយើងអាចវាយតម្លៃដោយមានជំនឿយ៉ាងស្មោះត្រង់ថាមានករណីសង្គ្រោះបន្ទាន់ដែលពាក់ព័ន្ធនឹងគ្រោះថ្នាក់ដែលជិតកើតឡើង ឬហានិភ័យបង្កឱ្យមានការស្លាប់ ឬការបង្ករបួសរាងកាយធ្ងន់ធ្ងរដល់មនុស្សម្នាក់ យើងអាចផ្តល់ទិន្នន័យអ្នកប្រើប្រាស់ដែលមានភាពចាំបាច់ដើម្បីរារាំងគ្រោះថ្នាក់នោះ ដូចដែលបានអនុញ្ញាតដោយច្បាប់ជាធរមាន។
ដើម្បីស្នើសុំទិន្នន័យនេះ អ្នកត្រូវតែដាក់បញ្ជូនសំណើរបស់អ្នកតាមរយៈ ទម្រង់បែបបទស្នើសុំការលាតត្រដាងសម្រាប់ករណីសង្គ្រោះបន្ទាន់។
សំណើសុំសម្រាប់ករណីសង្គ្រោះបន្ទាន់ទាំងអស់ត្រូវតែធ្វើឡើងដោយមន្ត្រីអនុវត្តន៍ច្បាប់ដែលបានធ្វើសច្ចាប្រណិធាន និងផ្ញើចេញមកពីដូមែនអ៊ីមែលរបស់មន្ត្រីអនុវត្តន៍ច្បាប់ផ្លូវការ (ប្រសិនបើបានផ្ញើតាមអ៊ីមែល)។ បុគ្គលិកដែលមិនមែនមន្ត្រីអនុវត្តន៍ច្បាប់ដែលដឹងពីស្ថានភាពសង្គ្រោះបន្ទាន់គួរទាក់ទងភ្លាមៗ និងដោយផ្ទាល់ទៅកាន់មន្ត្រីអនុវត្តន៍ច្បាប់ក្នុងតំបន់។
7. ផ្សេងទៀត
TikTok អាចស្នើសុំឱ្យអាជ្ញាធរអនុវត្តន៍ច្បាប់ដាក់បញ្ជូនសំណើសុំជំនួយផ្នែកច្បាប់ទៅអាជ្ញាធររដ្ឋាភិបាលដែលបានកំណត់នៅក្រោមក្របខណ្ឌសន្ធិសញ្ញាជំនួយផ្លូវច្បាប់ទៅវិញទៅមក (“MLAT”) ឬដោយលិខិតស្នើសុំផ្លូវការ។ ករណីនេះអាចកើតឡើងនៅក្នុងកាលៈទេសៈដែលអាជ្ញាធរអនុវត្តន៍ច្បាប់ដែលស្នើសុំមានទីតាំងនៅប្រទេសផ្សេងគ្នានឹងអង្គភាព TikTok ដែលផ្តល់សេវាកម្មដល់អ្នកប្រើប្រាស់ដែលពាក់ព័ន្ធដែលមានទិន្នន័យត្រូវបានស្នើសុំ (សូមមើលផ្នែកទី 1 ខាងលើ)។ សូមមើលសំណួរដែលសួរញឹកញាប់អំពីមន្ត្រីអនុវត្តន៍ច្បាប់របស់យើង ដើម្បីទទួលបានព័ត៌មានបន្ថែមទាក់ទងនឹង MLAT។
ក្នុងដំណើរការដាក់បញ្ជូនសំណើ មន្ត្រីអនុវត្តន៍ច្បាប់ត្រូវបានតម្រូវឱ្យធានាថាព័ត៌មានណាមួយដែលបានផ្តល់មានលក្ខណៈពេញលេញ និងត្រឹមត្រូវតាមចំណេះដឹង និងជំនឿល្អរបស់ពួកគេ និងថាការលាតត្រដាង (ឬសកម្មភាពផ្សេងទៀត) ដែលបានស្នើសុំគឺមានភាពចាំបាច់ និងសមាមាត្រសម្រាប់គោលបំណងក្នុងការទប់ស្កាត់ ការរកឃើញ ឬការស៊ើបអង្កេតបទល្មើស ឬដើម្បីរារាំងករណីសង្គ្រោះបន្ទាន់។ ក្រោយពេលដែលមន្ត្រីអនុវត្តន៍ច្បាប់បានទទួលសំណើនោះ អាជ្ញាធរអនុវត្តន៍ច្បាប់ត្រូវបានតម្រូវឱ្យចាត់ចែងទិន្នន័យទាំងនោះដោយអនុលោមតាមច្បាប់ជាធរមាន រួមទាំងច្បាប់ការពារទិន្នន័យដែលពាក់ព័ន្ធផងដែរ។
TikTok រក្សាសិទ្ធិក្នុងការស្វែងរកសំណងសម្រាប់ការចំណាយនានាដែលទាក់ទងនឹងការឆ្លើយតបចំពោះសំណើសុំរបស់មន្ត្រីអនុវត្តន៍ច្បាប់។
TikTok អាចធ្វើបច្ចុប្បន្នភាពគោលការណ៍ណែនាំទាំងនេះម្ដងម្កាល ហើយការផ្លាស់ប្តូរបែបនេះអាចត្រូវបានរៀបចំឡើងដោយផ្អែកលើកត្តាជាច្រើន រួមទាំងការអភិវឌ្ឍផ្នែកច្បាប់ ឬសិទ្ធិមនុស្ស ការផ្លាស់ប្តូរប្រតិបត្តិការ និង/ឬផលិតផលចំពោះផ្លេតហ្វម។ ការធ្វើបច្ចុប្បន្នភាពដែលពាក់ព័ន្ធទាំងអស់នឹងត្រូវបានបង្ហោះនៅលើគេហទំព័រ TikTok។
សំណួរដែលសួរញឹកញាប់អំពីមន្ត្រីអនុវត្តន៍ច្បាប់របស់ TikTok (“FAQS”)
សំណួរដែលសួរញឹកញាប់ទាំងនេះគួរតែត្រូវបានអានរួមគ្នាជាមួយគោលការណ៍ណែនាំស្តីពីការអនុវត្តន៍ច្បាប់ របស់ TikTok
សំណួរ៖ តើ TikTok មានវិធីសាស្រ្តអ្វីខ្លះក្នុងការដោះស្រាយសំណើសុំទិន្នន័យពីអាជ្ញាធរអនុវត្តន៍ច្បាប់?
TikTok ប្តេជ្ញាសហការជាមួយនឹងមន្ត្រីអនុវត្តន៍ច្បាប់ ហើយក៏គោរពឯកជនភាព សេរីភាពនៃការបញ្ចេញមតិ និងសិទ្ធិផ្សេងទៀតនៃអ្នកប្រើប្រាស់របស់យើងផងដែរ។ ដើម្បីឱ្យកិច្ចការនេះសម្រេចទៅបាន បន្ថែមពីលើគោលការណ៍ណែនាំទាំងនេះ TikTok មានគោលការណ៍ផ្ទៃក្នុងដែលគ្រប់គ្រងរបៀបដែល TikTok ចាត់ចែង និងឆ្លើយតបទៅនឹងសំណើរបស់មន្ត្រីអនុវត្តន៍ច្បាប់។ នីតិវិធីទាំងនេះត្រូវបានរៀបចំដោយអនុលោមតាមស្តង់ដារច្បាប់ និងសិទ្ធិមនុស្ស និងត្រូវបានបង្កើតឡើងក្នុងវិធីមួយដែលព្យាយាមដាក់កំហិតលើឥទ្ធិពលអវិជ្ជមានលើសិទ្ធិមនុស្ស ខណៈពេលដែលអនុញ្ញាតឱ្យ TikTok អនុលោមតាមសំណើផ្លូវច្បាប់ដែលមានសុពលភាព និងស្របច្បាប់ពីមន្ត្រីអនុវត្តន៍ច្បាប់ដើម្បីលាតត្រដាងទិន្នន័យអ្នកប្រើប្រាស់។
សំណើសុំទាំងអស់ត្រូវបានទទួលឆ្លងកាត់ការវាយតម្លៃដោយផ្អែកលើករណីនីមួយៗពីក្រុមការងារឆ្លើយតបរបស់មន្ត្រីអនុវត្តន៍ច្បាប់ដែលបានចាត់តាំងរបស់ TikTok មុននឹងលាតត្រដាងទិន្នន័យអ្នកប្រើប្រាស់ណាមួយ។ ក្រុមការងារនេះទទួលបានការបណ្តុះបណ្តាលឱ្យវាយតម្លៃសំណើសុំពីអាជ្ញាធរអនុវត្តន៍ច្បាប់ ហើយជារឿយៗចូលរួមក្នុងសកម្មភាពផ្សព្វផ្សាយលក្ខខណ្ឌតម្រូវរបស់ TikTok សម្រាប់ការលាតត្រដាងទិន្នន័យអ្នកប្រើប្រាស់ទៅកាន់អាជ្ញាធរអនុវត្តន៍ច្បាប់។
សំណួរ៖ តើ TikTok មានលក្ខខណ្ឌតម្រូវអ្វីខ្លះក្នុងការលាតត្រដាងទិន្នន័យអ្នកប្រើប្រាស់ទៅកាន់អាជ្ញាធរអនុវត្តន៍ច្បាប់?
លក្ខខណ្ឌតម្រូវរបស់ TikTok សម្រាប់ការលាតត្រដាងទិន្នន័យអ្នកប្រើប្រាស់ទៅកាន់អាជ្ញាធរអនុវត្តន៍ច្បាប់ត្រូវបានកំណត់យ៉ាងច្បាស់នៅក្នុងគោលការណ៍ណែនាំស្តីពីការអនុវត្តន៍ច្បាប់ របស់យើង (ជាពិសេសសូមមើលផ្នែកទី 1 និងទី 3)។ លក្ខខណ្ឌតម្រូវទាំងនេះឆ្លុះបញ្ចាំងពីគោលការណ៍ និងនីតិវិធីផ្ទៃក្នុងរបស់យើងសម្រាប់ការដោះស្រាយសំណើពីអាជ្ញាធរអនុវត្តន៍ច្បាប់ និងត្រូវបានរៀបចំឡើងដោយផ្អែកលើលក្ខខណ្ឌតម្រូវផ្លូវច្បាប់ដែលពាក់ព័ន្ធ និងការប្តេជ្ញាចិត្តរបស់យើងចំពោះសិទ្ធិមនុស្សអន្តរជាតិ រួមទាំងសេចក្ដីព្រាងច្បាប់អន្តរជាតិស្ដីពីសិទ្ធិមនុស្សផងដែរ។ ដោយសារច្បាប់ជាធរមានខុសគ្នាពីប្រទេសមួយទៅប្រទេសមួយទៀត ដូច្នេះច្បាប់កំណត់លើពេលណាដែលអាចលាតត្រដាងទិន្នន័យដោយស្របច្បាប់ក៏នឹងប្រែប្រួលក្នុងកម្រិតខ្លះដែរ ហើយគោលការណ៍ និងនីតិវិធីផ្ទៃក្នុងរបស់យើងបញ្ហាពីចំណុចនេះ ស្របពេលជាមួយគ្នានេះបង្ហាញពីការប្តេជ្ញាចិត្តជាសកលរបស់យើងចំពោះសេរីភាពនៃការបញ្ចេញមតិ និងឯកជនភាព។
សំណួរ៖ តើខ្ញុំស្វែងរកឈ្មោះអ្នកប្រើប្រាស់ TikTok ដោយរបៀបណា?
សំណួរ៖ តើ TikTok ធ្លាប់បដិសេធសំណើសុំទិន្នន័យពីអាជ្ញាធរអនុវត្តន៍ច្បាប់ដែរឬទេ?
បាទ/ចាស TikTok បដិសេធសំណើសុំទិន្នន័យពីអាជ្ញាធរអនុវត្តន៍ច្បាប់ ករណីដែលពួកគាត់មិនបំពេញតាមលក្ខខណ្ឌតម្រូវដែលត្រូវបានកំណត់យ៉ាងច្បាស់នៅក្នុង គោលការណ៍ណែនាំស្តីពីមន្ត្រីអនុវត្តន៍ច្បាប់របស់យើង។ ឧទាហរណ៍ទូទៅបំផុតមានដូចខាងក្រោម៖
- សំណើដែលមិនត្រូវបានបញ្ជូនទៅកាន់អង្គភាព TikTok ដែលត្រឹមត្រូវ
- សំណើដែលមិនបញ្ជាក់ពីនីតិវិធីផ្លូវច្បាប់ដែលផ្តល់សិទ្ធិឱ្យមន្ត្រីអនុវត្តន៍ច្បាប់ស្នើសុំ និងប្រមូលព័ត៌មាន។
- សំណើដែលមិនបង្ហាញពីប្រភេទនៃបទល្មើសដែលស្ថិតនៅក្រោមការស៊ើបអង្កេត កាលៈទេសៈនៃបទល្មើស និងវិធីដែលបទល្មើសនោះ/ទាំងនោះមានទំនាក់ទំនងទៅនឹង TikTok និង
- សំណើទូលំទូលាយពេកសម្រាប់ "ទិន្នន័យអ្នកប្រើប្រាស់ទាំងអស់" ឬករណីដែលមិនមានការបញ្ជាក់ចន្លោះកាលបរិច្ឆេទ។
សំណួរ៖ តើ TikTok ធ្វើយ៉ាងណាទើបធានាថាសំណើពីអាជ្ញាធរអនុវត្តន៍ច្បាប់មានសុពលភាព?
ក្រៅពីការបដិសេធសំណើពីអាជ្ញាធរអនុវត្តន៍ច្បាប់ដែលមិនត្រូវបានធ្វើឡើងស្របតាមនីតិវិធីផ្លូវច្បាប់ និងលក្ខខណ្ឌតម្រូវផ្លូវច្បាប់ដែលពាក់ព័ន្ធនឹង TikTok ដោយស្របតាមច្បាប់ជាធរមាន៖
- ព្យាយាមបង្រួមវិសាលភាពនៃសំណើសុំទិន្នន័យទាក់ទងនឹងបរិមាណទិន្នន័យដែលបានស្នើសុំ ចំនួនអ្នកប្រើប្រាស់ដែលសំណើទាំងនោះពាក់ព័ន្ធ និង/ឬរយៈពេលដែលសំណើទាំងនោះជាប់ទាក់ទង
- ស្នើសុំព័ត៌មានបន្ថែមក្នុងការគាំទ្រសំណើ (ជាពិសេស សម្រាប់ព័ត៌មានលម្អិតនៃនីតិវិធីផ្លូវច្បាប់ដែលពាក់ព័ន្ធ និង/ឬប្រភេទនៃបទល្មើសដែលកំពុងស៊ើបអង្កេត) ឬ
- ទាក់ទងទៅអាជ្ញាធរអនុវត្តន៍ច្បាប់ដែលស្នើសុំនោះដោយប្រាប់ថា សំណើតាមរយៈនីតិវិធីសន្ធិសញ្ញាជំនួយផ្លូវច្បាប់ទៅវិញទៅមក (“MLAT”) គឺមានភាពចាំបាច់ដើម្បីទទួលបានការលាតត្រដាងទិន្នន័យដែលបានស្នើសុំ។
សំណួរ៖ តើ TikTok ធ្លាប់លាតត្រដាងទិន្នន័យអ្នកប្រើប្រាស់ខាងក្រៅសំណើសុំផ្លូវច្បាប់ដែរឬទេ?
TikTok អាចលាតត្រដាងទិន្នន័យអ្នកប្រើប្រាស់ដោយមិនទទួលបានសំណើផ្លូវច្បាប់ជាផ្លូវការ (ផ្អែកលើនីតិវធីផ្លូវច្បាប់ដែលមានសុពលភាព) ក្នុងករណីដូចខាងក្រោម៖
- កាលៈទេសៈសង្គ្រោះបន្ទាន់៖ ដូចដែលបានពន្យល់នៅក្នុងផ្នែកទី 5 នៃ គោលការណ៍ណែនាំអំពីមន្ត្រីអនុវត្តន៍ច្បាប់របស់យើង ក្នុងករណីដែលបំពេញតាមលក្ខខណ្ឌសម្រាប់ការដែលមានករណីសង្គ្រោះបន្ទាន់ដែលពាក់ព័ន្ធនឹងគ្រោះថ្នាក់ដែលខិតជិតមកដល់ ឬហានិភ័យបង្កឱ្យស្លាប់ ឬការបង្ករបួសរាងកាយធ្ងន់ធ្ងរដល់មនុស្សម្នាក់ យើងអាចផ្តល់ទិន្នន័យអ្នកប្រើប្រាស់ដែលមានភាពចាំបាច់ក្នុងការរារាំងគ្រោះថ្នាក់នោះ ដូចដែលបានអនុញ្ញាតដោយច្បាប់ជាធរមាន។
- កាតព្វកិច្ចរាយការណ៍៖ នៅក្នុងកាលៈទេសៈមួយចំនួន TikTok ត្រូវមានកាតព្វកិច្ចផ្លូវច្បាប់ក្នុងការរាយការណ៍អំពីទិន្នន័យអ្នកប្រើប្រាស់មួយចំនួនទៅកាន់អាជ្ញាធរអនុវត្តន៍ច្បាប់ ឬទៅកាន់ស្ថាប័នដែលបានកំណត់ដូចជា មជ្ឈមណ្ឌលជាតិសហរដ្ឋអាមេរិកសម្រាប់កុមារដែលបាត់ខ្លួន និងត្រូវបានកេងប្រវ័ញ្ច (“NCMEC”) ជាដើម។
សំណួរ៖ តើសេណារីយ៉ូប្រភេទណាខ្លះដែលនឹងបង្កើតឱ្យមានស្ថានភាពសង្គ្រោះបន្ទាន់?
រាល់សំណើសុំលាតត្រដាងសម្រាប់ករណីសង្គ្រោះបន្ទាន់ទាំងអស់ឆ្លងកាត់ការវាយតម្លៃដោយផ្អែកលើករណីនីមួយៗ ហើយសំណើនីមួយៗនឹងត្រូវបានវាយតម្លៃដោយក្រុមការងារឆ្លើយតបរបស់មន្ត្រីអនុវត្តន៍ច្បាប់របស់យើងដោយផ្អែកលើកាលៈទេសៈជាក់លាក់របស់វា។ ទោះយ៉ាងណាក៏ដោយ ខាងក្រោមនេះគឺជាឧទាហរណ៍មួយចំនួនដែលអាចបង្កើតជាស្ថានភាពសង្គ្រោះបន្ទាន់៖
- ករណីសុវត្ថិភាពកុមារ និងការកេងប្រវ័ញ្ច
- មនុស្សបាត់ខ្លួន
- សេណារីយ៉ូធ្វើអត្តឃាត និងបង្កគ្រោះថ្នាក់ដល់ខ្លួនឯង
- ការគំរាមកំហែងពីអំពើហិង្សាដែលជិតមកដល់ ឬ
- ស្ថានភាពគ្រោះមហន្តរាយធម្មជាតិ ឬបង្កើតឡើងដោយមនុស្ស (ដូចជាអគ្គិភ័យ ទឹកជំនន់ រញ្ជួយដី ជាដើម)។
សំណួរ៖ តើ TikTok ទទួលយកសំណើសុំទិន្នន័យពីអាជ្ញាធរអនុវត្តន៍ច្បាប់នៅគ្រប់ប្រទេសដែរឬទេ?
ទោះបីជាអាជ្ញាធរអនុវត្តន៍ច្បាប់នៅបណ្ដាប្រទេសផ្សេងៗអាចដាក់បញ្ជូនសំណើទៅកាន់ TikTok ក៏ដោយ ក៏លក្ខខណ្ឌតម្រូវក្នុងការលាតត្រដាងទិន្នន័យនឹងប្រែប្រួលអាស្រ័យលើទីតាំងរបស់អ្នកប្រើប្រាស់ ទីតាំងរបស់អាជ្ញាធរអនុវត្តន៍ច្បាប់ដែលស្នើសុំ និងក្នុងករណីមួយចំនួន ប្រភេទទិន្នន័យដែលបានស្នើសុំ។ ក្នុងកាលៈទេសៈជាក់លាក់ TikTok នឹងទាក់ទងទៅអាជ្ញាធរអនុវត្តន៍ច្បាប់ ក្នុងករណីដែលសំណើតាមរយៈនីតិវិធីសន្ធិសញ្ញាជំនួយផ្លូវច្បាប់ទៅវិញទៅមក (ដែលគេស្គាល់ថាជា “MLAT”) គឺមានភាពចាំបាច់ដើម្បីទទួលបានការលាតត្រដាងទិន្នន័យដែលបានស្នើសុំ។ TikTok បោះផ្សាយរបាយការណ៍តម្លាភាពដោយមានព័ត៌មានអំពីចំនួនសំណើដែលទទួលបានពីប្រទេសនីមួយៗ។
សំណួរ៖ តើសន្ធិសញ្ញាជំនួយផ្លូវច្បាប់ទៅវិញទៅមក (“MLAT”) ជាអ្វី?
MLAT គឺជាសន្ធិសញ្ញារវាងប្រទេសពីរ ឬច្រើនដែលកំណត់និយមន័យលើរបៀបដែលប្រទេសនីមួយៗនឹងជួយទាក់ទងនឹងបញ្ហាផ្លូវច្បាប់ ដូចជាក្នុងដំណើរការស៊ើបអង្កេតឧក្រិដ្ឋកម្មជាដើម។ តាមរយៈ MLAT រដ្ឋាភិបាលនៃប្រទេសមួយអាចស្វែងរកជំនួយពីរដ្ឋាភិបាលក្នុងប្រទេសមួយផ្សេងទៀត ដើម្បីទទួលបានព័ត៌មានពីក្រុមហ៊ុនដែលមានទីតាំងនៅប្រទេសផ្សេងទៀត។
សំណួរ៖ តើក្នុងកាលៈទេសៈណាខ្លះដែលមានភាពចាំបាច់ឱ្យអាជ្ញាធរអនុវត្តន៍ច្បាប់ពឹងផ្អែកលើនីតិវិធី MLAT?
អាចជាការចាំបាច់ក្នុងកាលៈទេសៈដែលអាជ្ញាធរអនុវត្តន៍ច្បាប់ដែលស្នើសុំនោះមានទីតាំងនៅប្រទេសផ្សេងគ្នានឹងអង្គភាព TikTok ដែលផ្តល់សេវាកម្មដល់អ្នកប្រើប្រាស់ដែលពាក់ព័ន្ធ (សូមមើលផ្នែកទី 1 នៃ គោលការណ៍ណែនាំស្តីពីមន្ត្រីអនុវត្តន៍ច្បាប់)។ ប្រសិនបើមន្ត្រីអនុវត្តន៍ច្បាប់មិនច្បាស់ថាតើគាត់គួរពឹងផ្អែកលើ MLAT ឬយ៉ាងណានោះទេ គាត់អាចទាក់ទង TikTok បាន។ នៅពេលទទួលបានសំណើបែបនេះ TikTok នឹងព្យាយាមទាក់ទងទៅអាជ្ញាធរអនុវត្តន៍ច្បាប់ថាតើ MLAT មានភាពសមរម្យឬយ៉ាងណា និងព្យាយាមបញ្ជូនគាត់ទៅកាន់ "អាជ្ញាធរកណ្តាល" ដែលបានកំណត់សម្រាប់គោលបំណង MLAT នៅក្នុងប្រទេសដែលសមស្រប។
ឧទាហរណ៍ សម្រាប់អ្នកប្រើប្រាស់ដែលមានទីតាំងនៅក្រៅសហរដ្ឋអាមេរិក ចក្រភពអង់គ្លេស តំបន់សេដ្ឋកិច្ចអឺរ៉ុប និងស្វីស សេវាកម្ម TikTok ត្រូវបានផ្តល់ដោយអង្គភាព TikTok របស់សិង្ហបុរី។ ក្នុងឧទាហរណ៍នេះ យើងនឹងទាក់ទងទៅអាជ្ញាធរអនុវត្តន៍ច្បាប់ដែលស្នើសុំនោះ (ប្រសិនបើគាត់មានទីតាំងនៅខាងក្រៅប្រទេសសិង្ហបុរី) ដោយប្រាប់ឱ្យគាត់ត្រូវតែដាក់បញ្ជូនសំណើទៅកាន់ "អាជ្ញាធរកណ្តាល" របស់ប្រទេសសិង្ហបុរីសម្រាប់គោលបំណង MLAT ប្រសិនបើគាត់ចង់បន្តការស្នើសុំការលាតត្រដាងទិន្នន័យអ្នកប្រើប្រាស់ដោយអង្គភាព TikTok របស់សិង្ហបុរី។
សំណួរ៖ តើសំណើសុំពីបុគ្គលមិនមែនជាមន្ត្រីអនុវត្តន៍ច្បាប់គួរតែផ្ញើទៅកន្លែងណា?
សំណើសុំពីបុគ្គលមិនមែនជាមន្ត្រីអនុវត្តន៍ច្បាប់គួរតែត្រូវបានបញ្ជូនដូចខាងក្រោម៖
- ខ្លឹមសាររាយការណ៍៖ ព័ត៌មានលម្អិតអំពីរបៀបរាយការណ៍ប្រភេទផ្សេងៗនៃខ្លឹមសារដែលអាចបំពានលើគោលការណ៍ណែនាំសហគមន៍របស់ TikTok អាចរកបាននៅទីនេះ។
- រាយការណ៍អំពីការរំលោភបំពាន IP៖ គួរតែមានការរាយការណ៍អំពីសិទ្ធិអ្នកនិពន្ធដែលត្រូវបានចោទប្រកាន់ ឬការរំលោភបំពានពាណិជ្ជសញ្ញាដោយអនុលោមតាមគោលការណ៍កម្មសិទ្ធិបញ្ញារបស់ TikTok និងអាចត្រូវបានដាក់បញ្ជូនជា របាយការណ៍ស្តីពីការរំលោភបំពានសិទ្ធិអ្នកនិពន្ធ ឬជា របាយការណ៍ស្ដីពីការរំលោភបំពានលើពាណិជ្ជសញ្ញា។
សំណួរ៖ តើ TikTok ដំណើរការសំណើសុំលឿនប៉ុនណា?
ក្រុមការងារឆ្លើយតបរបស់មន្ត្រីអនុវត្តន៍ច្បាប់ដែលបានចាត់តាំងរបស់ TikTok ព្យាយាមឆ្លើយតបទៅនឹងសំណើទាំងអស់ក្នុងលក្ខណៈទាន់ពេលវេលា ប៉ុន្តែពេលវេលាឆ្លើយតបអាចប្រែប្រួលជាពិសេសដោយសារតែចំនួនបន្ទុកសំណុំរឿងតាមពេលវេលាកំណត់ និងភាពស្មុគស្មាញនៃសំណើ។ ប្រសិនបើសំណើជាក់លាក់ណាមួយមានរយៈពេលខ្លី យើងនឹងស្នើសុំឱ្យមន្ត្រីអនុវត្តន៍ច្បាប់ដែលស្នើសុំនោះឱ្យកត់សម្គាល់រឿងនេះនៅក្នុងសំណើ (ដោយពន្យល់ពីមូលហេតុ)។ អាចនឹងមានពេលវេលាឆ្លើយតបយូរជាងនេះ នៅពេលដែលសំណើមិនបំពេញតាមលក្ខខណ្ឌតម្រូវដែលមានចែងក្នុង គោលការណ៍ណែនាំស្តីពីមន្ត្រីអនុវត្តន៍ច្បាប់ និងសំណួរដែលសួរញឹកញាប់អំពីមន្ត្រីអនុវត្តន៍ច្បាប់ទាំងនេះ។
សំណួរ៖ តើខ្ញុំធ្វើដូចម្តេច ប្រសិនបើខ្ញុំទទួលបានរបាយការណ៍ Cybertip ដែលធ្វើឡើងដោយ TikTok ទៅកាន់ NCMEC?
ប្រសិនបើមន្ត្រីអនុវត្តន៍ច្បាប់បានទទួលរបាយការណ៍ Cybertip ដែលធ្វើឡើងដោយ TikTok ទៅកាន់ NCMEC ហើយឥឡូវនេះកំពុងស្នើសុំទិន្នន័យអ្នកប្រើប្រាស់បន្ថែមទាក់ទងនឹងការស៊ើបអង្កេត សំណើត្រូវតែបំពេញតាមលក្ខខណ្ឌតម្រូវដែលមានចែងក្នុងគោលការណ៍ណែនាំស្តីពីមន្ត្រីអនុវត្តន៍ច្បាប់ របស់យើង និងសំណួរដែលសួរញឹកញាប់អំពីមន្ត្រីអនុវត្តន៍ច្បាប់ទាំងនេះ។ ដើម្បីជួយយើងឱ្យដំណើរការសំណើរបស់អ្នកកាន់តែមានប្រសិទ្ធភាព សូមបញ្ជាក់នៅក្នុងសំណើរបស់អ្នកនូវលេខរបាយការណ៍ដែលបានកំណត់ចំពោះរបាយការណ៍ Cybertip ដោយ NCMEC។